ثروت گیلانی کا والدین کی ذمہ داریوں پر اہم بیان، سوشل میڈیا پر پذیرائی

کراچی (شوبز ڈیسک) پاکستان شوبز انڈسٹری کی معروف اداکارہ ثروت گیلانی نے بچوں کی تربیت اور والدین کے کردار سے متعلق تفصیلی گفتگو کرتے ہوئے ماں اور باپ دونوں کی ذمہ داریوں پر اہم نکات بیان کیے ہیں۔ایک مارننگ شو میں گفتگو کے دوران انہوں نے کہا کہ اکثر مائیں بچوں کے ساتھ سخت رویہ اس لیے اختیار کرتی ہیں کیونکہ وہ صبح سے رات تک ان کی مکمل دیکھ بھال، تعلیم، خوراک، ہوم ورک اور روزمرہ نظم و ضبط سنبھال رہی ہوتی ہیں۔اداکارہ کے مطابق جب ایک ماں پورا دن بچوں کی تربیت اور گھریلو ذمہ داریوں میں مصروف رہتی ہے تو دن کے اختتام پر اس کا صبر ختم ہونا ایک فطری امر ہے، تاہم اکثر اوقات شوہر صرف اس لمحے کو دیکھتے ہیں جب ماں تھکن یا غصے کا اظہار کرتی ہے اور پورے دن کی محنت کو نظر انداز کر دیتے ہیں۔انہوں نے کہا کہ اگر والدین کے کردار کو وقتی طور پر تبدیل کیا جائے تو بیشتر افراد اس دباؤ کو برداشت نہیں کر پاتے، کیونکہ بچوں کی مسلسل دیکھ بھال ایک مشکل ذمہ داری ہے۔ثروت گیلانی نے مردوں کو مشورہ دیا کہ وہ اپنی بیویوں کی محنت کو سراہیں، ان کی حوصلہ افزائی کریں اور بچوں کے سامنے ان کے کردار کی قدر کریں۔والد کے کردار پر گفتگو کرتے ہوئے انہوں نے کہا کہ باپ کا رویہ اکثر اس کی اپنی پرورش اور خاندانی ماحول سے جڑا ہوتا ہے، اور جو بچے جذباتی یا جسمانی طور پر والد سے دوری میں بڑے ہوتے ہیں ان کے اثرات مستقبل کے رویوں پر بھی پڑتے ہیں۔اداکارہ کے مطابق بعض اوقات مائیں اپنے بیٹوں کو جذباتی طور پر بہت قریب کر لیتی ہیں جس سے ان کے مستقبل کے خاندانی کردار میں عدم توازن پیدا ہو سکتا ہے۔ثروت گیلانی کے اس بیان کو سوشل میڈیا پر خوب پذیرائی مل رہی ہے اور صارفین اسے حقیقت پسندانہ اور قابل غور قرار دے رہے ہیں۔