جمی کمل کے طنز پر تنازع شدت اختیار کر گیا، وائٹ ہاؤس کا برطرفی کا مطالبہ

نیویارک( شو بز ڈیسک)معروف کامیڈین جمی کمل کا ایک طنزیہ مذاق خود ان کے لیے مشکل صورتحال پیدا کر گیا ہے۔غیر ملکی میڈیا رپورٹس کے مطابق جمی کمل نے ایک پروگرام میں خاتونِ اول میلانیا ٹرمپ کو مذاق میں "متوقع بیوہ" کہہ دیا تھا، جس پر امریکی صدر ڈونلڈ ٹرمپ اور میلانیا شدید ناراض ہو گئے۔رپورٹس کے مطابق اس بیان کے بعد وائٹ ہاؤس نے جمی کمل کی برطرفی کا مطالبہ کیا ہے، جبکہ ڈزنی کے ٹی وی لائسنس بھی خطرے میں پڑ گئے ہیں اور امریکی کمیونیکیشن کمیشن نے ڈزنی کے خلاف تحقیقات شروع کر دی ہیں۔اس معاملے پر جمی کمل نے وضاحت دیتے ہوئے کہا کہ ان کا مقصد صرف صدر اور ان کی اہلیہ کے درمیان 23 سالہ عمر کے فرق پر ہلکا پھلکا طنز کرنا تھا۔ادھر معروف اداکار جارج کلونی نے جمی کمل کے دفاع میں کہا ہے کہ وہ ایک کامیڈین ہیں اور ان کے مذاق کو اس قدر سنجیدگی سے لینا درست نہیں۔دوسری جانب ڈزنی نے بھی فیڈرل کمیونیکیشن کمیشن کو قانونی جواب دینے کا فیصلہ کیا ہے۔