ونود کھنہ کا فلمی عروج پر روحانیت کا انتخاب، اوشو آشرم میں سادہ زندگی نے سب کو حیران کر دیا

ممبئی( شو بز ڈیسک)معروف بھارتی اداکار ونود کھنہ نے انیس سو بیاسی میں اپنے کیریئر کے عروج کے دور میں فلمی دنیا کو خیرباد کہہ کر روحانیت کی راہ اختیار کر لی اور امریکا کے شہر اوریگون میں واقع اوشو آشرم میں سکونت اختیار کی۔ ان کے اس فیصلے نے فلمی دنیا اور مداحوں کو حیرت میں ڈال دیا تھا۔بھارتی میڈیا کے مطابق ونود کھنہ نے ایک پریس کانفرنس میں کہا تھا کہ وہ دنیاوی زندگی کے دباؤ سے نکل کر باطنی سکون اور مراقبے کی طرف جانا چاہتے ہیں۔ایک انٹرویو میں انہوں نے بتایا کہ وہ ذہنی بے چینی، غصے اور مسلسل منفی خیالات سے تنگ آ چکے تھے اور انہیں احساس ہوا کہ مکمل طور پر روحانی زندگی اختیار کرنا ضروری ہے۔ان کی اہلیہ کویتا کھنہ کے مطابق ونود کھنہ کو روحانیت سے دلچسپی کم عمری سے ہی تھی اور وہ اکثر مذہبی اجتماعات میں شرکت کے لیے شوٹنگ چھوڑ دیتے تھے۔ بعد ازاں خاندانی سانحات نے ان کے روحانی رجحان کو مزید گہرا کر دیا۔انہوں نے بتایا کہ آشرم میں رہائش کے دوران بھی وہ فلمی سرگرمیوں سے مکمل طور پر دور نہیں ہوئے اور نہایت سادہ زندگی گزارتے ہوئے باغبانی اور مراقبے میں وقت گزارتے تھے۔ان کے بیٹے اکشے کھنہ کے مطابق بچپن میں وہ اپنے والد کے اس فیصلے کو پوری طرح نہیں سمجھ سکے تاہم وقت کے ساتھ انہوں نے اسے ایک ذاتی اور روحانی انتخاب کے طور پر قبول کر لیا۔واضح رہے کہ ونود کھنہ پانچ سال کے وقفے کے بعد انیس سو ستاسی میں دوبارہ فلمی دنیا میں واپس آئے اور بعد ازاں کئی کامیاب فلموں کا حصہ بنے۔